ការកោះហៅអង្គរាជទូរឬអង្គរដ្ឋទូតមកឱ្យចូលស្រុកគឺជាករណីកម្រដោយសារវាគឺជាសញ្ញាណនៃការប្រេះស្រាំទំនាក់ទំនងការទូតផង និងបង្ហាញអំពីដំណាក់កាលនៃការឈានទៅរកការផ្ដាច់ទំនាក់ទំនងការទូត។ ក៏ប៉ុន្តែនៅថ្ងៃម្សិលមិញនេះ ប្រធានាធិបតីបារាំងលោក ម៉ាក្រុង (Emmanuel Macron) បានសម្រេចចិត្ដកោះហៅអង្គរដ្ឋទូតរបស់ខ្លួនប្រចាំនៅប្រទេសអូស្ត្រាលី និងសហរដ្ឋអាមេរិកមកចូលស្រុកវិញ ដែលប្រទេសទាំង ២ នេះគឺជាសម្ព័ន្ធមិត្ដដ៏ល្អួកល្អិនជាមួយបារាំងរាប់សិបឆ្នាំណាស់មកហើយ។ ការសម្រេចនេះបែបនេះត្រូវបានគេយល់ឃើញថាប្រទេសបារាំងកំពុងតែអន់ចិត្ដខឹងសម្បារជាមួយប្រទេសអូស្ត្រាលី និងសហរដ្ឋអាមេរិកយ៉ាងខ្លាំង ដែលម្ខាងបារាំងយល់ថាប្រទេសអូស្ត្រាលីក្បត់និងមិនគោរពបារាំង និងម្ខាងទៀតបារាំងយល់ថាសហរដ្ឋអាមេរិកលួចចាក់ពីក្រោយខ្នងតាមរយៈលួយចរចាជាមួយអូស្ត្រាលី។
តើអ្វីគឺជាឬសគល់នៅនយោបាយការបរទេសរាត្រីទឹកខ្មេះរវាងបារាំងនិងប្រទេសសម្ព័ន្ធមិត្ដសហរដ្ឋអាមេរិក និងអូស្ត្រាលី?
ដើម្បីឆ្លើយសំណួរនេះ យើងគួរក្រឡេកទៅមលើកិច្ចសហប្រតិបត្ដិការដែលមានឈ្មោះថា AUKUS រវាងអាមេរិក អង់គ្លេស និងអូស្ត្រាលីលើសន្ដិសុខនិងស្ថិរភាពនៅក្នុងតំបន់ឥណ្ឌូប៉ាស៊ីហ្វិកនៅថ្ងៃទី១៥ ខែកញ្ញា កន្លងទៅនេះ។ នៅក្នុងកិច្ចសហប្រតិតបត្ដិការនេះ អាមេរិកនិងអង់គ្លសនឹងជួយអូស្ត្រាលីឱ្យមាននាវាមុជទឹកដើរដោយ ថាមពលនុយក្លេអ៊ែរដោយផ្ដល់នូវបច្ចេកវិទ្យា និងសមត្ថភាពក្នុងការពង្រាយទ័ពនាវាមុជទឹកដើដោយនុយក្លេអ៊ែរ។ តាមពិតទៅ កិច្ចសហប្រតិបត្ដិការនេះគួរមានតែចិនទេដែលមិនសប្បាយចិត្ដ ក៏ប៉ុន្តែបារាំងបានបង្ហាញពីភាពក្រេវក្រោដជាមួយសហរដ្ឋអាមេរិកដែរព្រមទាំងបានចោទចូ បៃឌិនថាបានលួចចាក់ពីក្រោយខ្នង និងបានប្រៀបធៀបលោក ចូ បៃឌិនថា ដូចអតីតប្រធានាធិបតី ដូណាល់ ត្រាំដែលគេមិនអាចនឹកស្មានដល់លើការសម្រេចចិត្ដ។
មូលហេតុចម្បងដែលធ្វើឱ្យបារាំងខឹងសម្បារជាមួយប្រទេសសម្ព័ន្ធមិត្ដអាមេរិកបែបនេះគឺដោយសារខ្លួនបានបាត់បង់ប្រយោជន៍មួយយ៉ាងធំផ្នែកចំណេញសេដ្ឋកិច្ចលើកងទ័ពជើងទឹកជាមួយប្រទេសអូស្ត្រាលី។ យោងតាមការចេញផ្សាយរបស់ CNN បារាំងនឹងខាតបង់ទឹកប្រាក់ចំនួន ៦៥ ប៊ីលានដុល្លារសហរដ្ឋអាមេរិក ក្នុងកិច្ចសិន្យាជាមួយអូស្រ្តាលីលើការលក់នាវាមុជទឹកដើរដោយម៉ាស៊ូត។ ការប្រតិកម្មរបស់បារាំងបែបនេះដូចជាសាច់ជ្រូកបីជាន់កំពុងជិតបានដល់មាត់ហើយ ក៏ប៉ុន្តែបែរជាអាមេរិកដណ្ដើមយកទៅវិញ។ យ៉ាងណាមិញ បន្ទាប់ពីការរិះគន់ដោយកំហឹងពីបារាំង ខាងអូស្ត្រាលីបានចេញមកបកស្រាយថាខ្លួនបានប្រាប់ទៅខាង បារាំងនៅខែមិថុនាកន្លងទៅនេះថានឹងកែសម្រួលពិចារណាឡើងវិញលើកិច្ចព្រមព្រៀងតម្លៃ ៤០ ប៊ីលានដុល្លារអាមេរិក។ នាយករដ្ឋមន្ត្រីអូស្ត្រាលី Scott Morrison ក៏បានបន្ថែមថាលោកបាននិយាយច្បាស់ណាស់ដែលអូស្ត្រាលីនឹងសម្រេចចិត្ដដោយផ្អែកលើប្រយោជន៍របស់ខ្លួន។ នេះបានបង្ហាញថា ត្បិតគោលបំណងធំមួយនៃកិច្ចសហប្រតិបត្ដិការ AUKUS គឺកៀរគងប្រទេសសម្ព័ន្ធមិត្ដឱ្យក្លាយជាធ្លុងមួយ ក៏ប៉ុន្តែក៏បានបង្កើតភាពល្អក់កកររវាងគ្នានឹងគ្នាដែរ ដែលបារាំងខឹងអាមេរិកផងនិងអូស្ត្រាលីផង។
យុទ្ធសាស្ត្រប្រកួតប្រជែងថ្មីរវាងអាមេរិកនិងចិនគឺការកៀរគរប្រទេសសម្ព័ន្ធមិត្ដ
កិច្ចសហប្រតិបត្ដិការ AUKUS នេះក៏ជាសារនិងសញ្ញាណមួយទៀតឱ្យកាន់តែច្បាស់ទៅឱ្យចិនថា សហរដ្ឋអាមេរិកនឹងមិនប្រឈមមុខប្រកួតប្រជែងជាមួយចិនតែម្នាក់ឯងដូចជំនាន់រដ្ឋការរបស់លោក ដូណាល់ ត្រាំ ឡើយប៉ុន្តែអាមេរិកនឹងលើកប្រទេសជាសម្ព័ន្ធមិត្ដមកខ្ទប់ឥទ្ធិពលរបស់ចិននៅក្នុងតំបន់តែម្ដង។ ការជួយឱ្យអូស្ត្រាលីមាននាវាមុខទឹកដើរដោយថាមពលនុយក្លេអ៊ែរ មិនត្រឹមតែជួយអូស្ត្រាលីឱ្យមាន ទឹកមាត់ប្រៃជាមួយចិនទេ ក៏ជួយឱ្យអាមេរិកដើរក្រឡាទីតាំងភូមិសាស្ត្រនៅឥណ្ឌូប៉ាស៊ីហ្វិកឱ្យល្អដែរ។ ជាក់ស្ដែង នៅពេលដែលកងទ័ពជើងទឹករបស់អូស្ត្រាលីខ្លាំង នោះក៏អាចជួយសម្ព័ន្ធមិត្ដឯទៀតដែល កំពុងមានការគម្រាមកំហែងដោយប្រទេសចិន ដូចជាតៃវ៉ាន់ ឥណ្ឌា ឬជម្លោះសមុទ្រចិនខាងត្បូង។ មួយវិញទៀត ការជួយជ្រោមជ្រែងរបស់អាមេរិកនិងអង់គ្លេសនេះ ក៏ប្រៀបបានជាការផ្ដល់ក្ដីសង្ឃឹមទៅឱ្យប្រទេសអូស្ត្រាលីយ៉ាងខ្លាំងដែរ ដោយសារអូស្ត្រាលី កំពុងតែមាននយោបាយការបរទេសដ៏ជូរចត់ជាមួយចិនក្នុងអំឡុង ២ ឆ្នាំចុងក្រោយនេះ ដែលចិនមានប្រៀបជាងអូស្ត្រាលី។
ប្រតិកម្មរបស់ចិន
ខាងភាគីចិនវិញក៏បានចេញមុខលើកិច្ចសហប្រតិបត្ដិការ AUKUS ដែរដោយថាកិច្ចសហប្រតិបត្ដិការនេះមិនគួរឱ្យចោលគោលដៅទៅលើប្រទេសទី៣ឡើយ និងព្រមានថានឹងអាចមានការប្រកួតប្រជែងសម្ភាវុធនៅក្នុងតំបន់។ យោងតាមការចេញផ្សាយរបស់ Reuter ខាងភាគីចិនបានចោទកិច្ចសហប្រតិបត្ដិការ AUKUS នេះថាកំពុងធ្វើឱ្យមានអសន្តិសុខនិងអស្ថិរភាពនៅក្នុងតំបន់ទៅវិញទេ។ គួរបញ្ជាក់ឡើងវិញថា ចិនបច្ចុប្បន្នមិនមែនជាខ្លាក្រដាសដូចកាលពីប្រវត្ដិសាស្ត្រឡើយ ដោយសារតែទំហំសេដ្ឋកិច្ច តួនាទីសេដ្ឋកិច្ចនៅក្នុងពិភពលោក និងការពង្រឹងវិស័យកងទ័ពនៅក្នុងតំបន់ជារៀងរាល់ឆ្នាំផងដែរ។ នោះន័យនេះ ប្រទេសចិនអាចប្រឈមមុខជាមួយប្រទេសនានាដោយប្រើសេដ្ឋកិច្ចមកជាសន្លឹកបៀរក្នុងការប្រកួតប្រជែងផង និងប្រើអំណាចនៃសក្ដានុពលនៃយោធាផង។ យ៉ាងណាមិញ ត្បិតតែប្រទេសចិនអាចប្រឈមមុខជាមួយសម្ព័ន្ធមិត្ដអាមេរិកក៏ពិតមែន ប៉ុន្តែបើយោងតាមការសិក្សា របស់ Bloomberg ការដែលចូលរួមជាក្រុមបែបនេះនឹងធ្វើឱ្យកំណើនសេដ្ឋកិច្ចចិនថយចុះ ១,៦% ដែលនេះអាចរចាប់ហ្រ្វាំងល្បឿននៃឥទ្ធិពលចិនបានយ៉ាងច្រើនសម្បើម។
យ៉ាងណាក្ដី ត្បិតការដកអង្គរដ្ឋទូតរបស់បារាំងចេញពីសហរដ្ឋអាមេរិក និងអូស្ត្រាលីគឺបង្ហាញពីភាពល្អក់កករនៃទំនាក់ទនងរវាងប្រទេសសម្ព័ន្ធមិត្ដ ក៏ប៉ុន្តែបារាំងធ្វើនេះក៏ដើម្បីជាថ្នូរនៃការចរចាបន្ថែមរវាងភាគីអូស្ត្រាលីនិងអាមេរិក។ ក្នុងស៊ីណារីយ៉ូដែលបារាំងមិនមានប្រតិកម្មសោះឬគ្រាន់ត្រឹមតែរិះគន់លើកិច្ចព្រមព្រៀង AUKUS នោះបារាំងនឹងត្រូវខាតបង់ប្រាក់ដោយគ្មានន័យ និងនេះក៏អាចជាគម្រូដល់ប្រទេសសម្ព័ន្ធផ្សេងទៀតមកក្បត់បារាំងដោយសារទោះបីជាខ្សែលើបារាំងយ៉ាងណាក៏បារាំងមិនអាចធ្វើអ្វីបាន។ ការធ្វើរបស់លោក ម៉ាក្រុង ដូច្នេះ ក៏ប្រហែលជាលោកយល់ឃើញថាអាមេរិកនឹងមិនបោះបង់បារាំងចោលទេ ដែលជាហេតុនឹងមានការចរចាមួយរវាងលោក ម៉ាក្រុងនិងលោក បៃឌិន។ គួររំលឹកបន្តិចថា ការចរចាអាចជោគជ័យបាន ដរាបណាភាគីចូលរួមឈ្នះទាំងសងខាង ហើយបារាំងនឹងទទួលប្រយោជន៍មួយចំនួនដើម្បីរំងាបកំហឹង។
